Pezullim të lejeve të drejtimit dhe gjoba,Policia publikon ndëshkimet e fundjavës

Sipas autoriteteve, në Rrugën e Kombit janë pezulluar 82 leje drejtimi  dhe  janë vendosur 123 masa administrative, me vlerë 40.000 lekë të rinj, për qarkullim me shpejtësi nga 145 km/h deri në 166 km/h. Drejtuesit e këtyre mjeteve ishin shtetas kosovarë.

Përgjatë ditës së diel, deri në orët e vona të mbrëmjes, janë skanuar nga makina inteligjente dhe radarët automatikë në lëvizje, 362 mjete që qarkullonin me shpejtësi nga 115 km/h deri në 134 km/h.

Në aksin rrugor Thumanë – Milot  janë evidentuar nga patrullimet në lëvizje, 89 raste të parakalimeve të gabuara.  Drejtuesit që kryen parakalimet e gabuara u ndëshkuan me masa administrative.

Janë ndëshkuar me masë administrative, 10.000 lekë të rinj secili, 12 drejtues mjetesh, për parakalime të gabuara në kthesa, me rrezikshmëri për përfshirje në ngjarje rrugore.

Me telefon në timon, ndëshkohen 1147 shoferë, pezullohen 113 patenta në Tiranë

Policia Rrugore e Tiranës gjatë javës që lamë pas ka kryer kontrolle në rrugët e kryeqytetit ku u përqendrua në evidentimin dhe ndëshkimin e shkeljeve që janë rrezik potencial për sigurinë e jetës në rrugë.

Uniformat blu bëjnë më dije se përgjatë një jave u arrestuan dhe u proceduan penalisht 32 persona, për shkelje të ndryshme të kryera.

Mësohet se janë ndëshkuar me masë administrative 1174 drejtues mjetesh, për përdorim të celularit gjatë drejtimit të mjetit.

Ndërsa 496 drejtues mjetesh janë ndëshkuar për mosvendosje të rripit të sigurimit.

Për parakalime të gabuara, manovra të rrezikshme në rrugë, shpejtësi mbi normën e lejuar dhe shkelje të tjera, të ndryshme janë ndëshkuar 1666 drejtues mjetesh.

Gjithsej janë pezulluar 113 leje drejtimi, për drejtim mjeti nën efektin e alkoolit apo në gjendje të dehur, si dhe për shpejtësi tej normave të lejuara.

Janë vendosur 618 masa administrative, për mosvendosje të kaskës mbrojtëse nga drejtuesit e motomjeteve.

Dhe janë hequr 2 palë targa të çregjistruara apo që u kishte përfunduar afati i përdorimit në shtetin e origjinës.