Përplasen 3 automjete në aksin Memaliaj-Krahës, ndërron jetë 40 vjeçarja

Uniformat blu bëjnë me dije se 3 automjete janë përplasur me njëra-tjetrën e për pasojë ka ndërruar jetë një pasagjere.

Mësohet se 2 persona të tjerë kanë mbetur të plagosur dhe janë dërguar në spital për të marrë ndihmën mjekësore.

“Rreth orës 11:45, në aksin rrugor “Memaliaj-Krahës”, janë përplasur automjeti me drejtues shtetasin A. M. me automjetin me drejtues shtetasin L. M.. Nga përplasja janë dëmtuar 2 drejtuesit e automjeteve dhe 1 pasagjere ende e paidentifikuar. Si pasojë e dëmtimeve, shtetasja ka humbur jetën, ndërsa 2 drejtuesit e automjeteve janë në kujdesin e mjekëve. Po punohet për identifikimin e shtetases që ka humbur jetën dhe për sqarimin e rrethanave të aksidentit”, njofton policia.

Durrës, vëllezërit tentojnë të shtypin pronarin e makinës që morën për ta lyer

Dy vëllezër, pronarë të një subjekti për lyerje automjetesh janë arrestuar pasi kanë tentuar të shtypin me automjet një 46-vjeçar.

Burri kishte konstatuar se dy vëllezërit jo vetëm që nuk po i kryenin punimet e premtuara për makinën por po e përdornin mjetin për nevojat e tyre.

Në momentin që pronari i automjetit i ka konstatuar ata kanë tentuar ta shtypin.

Ndërsa makina është përplasur me bordurë, burri është hedhur mbi kofano të makinës. Më pas dy vëllezërit janë larguar duke braktisur automjetin, menjëherë kanë organizuar punën për kapjen e tyre.

”Shërbimet e Komisariatit të Policisë Durrës, sapo janë njoftuar se 2 shtetas kishin tentuar të shtypnin me automjet, një shtetas, kishin përplasur automjetin me bordurën, dhe më pas ishin larguar duke braktisur automjetin, menjëherë kanë organizuar punën për kapjen e tyre.

Falë reagimit në kohë dhe verifikimeve të shpejta në vendngjarje, shërbimet e Policisë janë vënë në ndjekje të 2 shtetasve, duke bërë të mundur lokalizimin, kapjen dhe arrestimin e tyre, konkretisht: D. C., 27 vjeç dhe E. C., 20 vjeç, vëllezër, të dy banues në fshatin Fermë Sukth.

Nga veprimet e para hetimore rezultoi se shtetasi E. A. kishte çuar automjetin e tij, në subjektin e vëllezërve, për ta lyer. Vëllezërit nuk e kishin lyer automjetin, por lëviznin me të, në qytet.

Në Shkozet, në rrugën që të çon te kualidimi, shtetasi E. A. ka konstatuar 2 vëllezërit që lëviznin me automjetin e tij. Ai i ka dalë para automjetit, që ta ndalonte, por vëllezërit kanë tentuar ta shtypin, duke e marrë në kofanon e automjetit, deri në afërsi të universitetit. Më pas ata kanë përplasur automjetin me trafikndarësen, e kanë braktisur atë dhe janë larguar.

Shtetasi E. A. nuk ka pësuar dëmtime fizike dhe ka njoftuar menjëherë Policinë, për ngjarjen e ndodhur. Shërbimet e Policisë janë vënë në ndjekje të 2 vëllezërve dhe kanë bërë të mundur kapjen dhe arrestimin e tyre në flagrancë”, njoftoi policia.

Materialet procedurale i kaluan Prokurorisë, për veprime të mëtejshme.

Makina del nga rruga dhe përfshihet në flakët, plagoset 8-vjeçarja në Belsh

Një 8-vjeçare mbeti e plagosur pasi automjeti ku udhëtonte ajo bashkë me familjen e saj ka dalë nga rruga dhe është përfshirë nga flakët. 

Policia bën të ditur se ngjarja ndodhi rreth orës 16:45, në aksin rrugor “Belsh-Kuçovë”. 

“Rreth orës 16:45, në aksin rrugor “Belsh-Kuçovë”, automjeti me drejtues shtetasin E. M., ka dalë nga rruga dhe për këtë shkak automjeti është përfshirë nga flakët. Si pasojë është dëmtuar lehtë dhe po merr asistencë mjekësore vajza e shtetasit E. M., 8 vjeçe (pasagjere), e cila është jashtë rrezikut për jetën. Grupi hetimor në vendngjarje po punon për përcaktimin e rrethanave të këtij rasti”,-njofton policia.