Pas 7 orësh i bllokuar/ Hapet qarkullimi në aksin Librazhd-Prrenjas

Si pasojë e bllokimit u krijuan dhe radhë kilometrike trafiku të automjeteve.

Njoftimi i policisë: 

Në vijim të informacionit të dhënë për bllokimin e qarkullimit në aksin rrugor “ Librazhd – Qafë Thanë”, në vendin e quajtur Dragostunjë, ju njoftojmë se aktualisht rruga është hapur dhe qarkullimi i automjeteve vijon normalisht në të dyja kahet e lëvizjes.

Shërbimet e Policisë Rrugore, patrullat e Përgjithshme dhe Shqiponjat janë prezente në të gjithë gjatësinë e aksit, me qëllim monitorimin e lëvizjes së lirë të automjeteve.

Për shkak të fluksit të shtuar, Policia Rrugore e Elbasanit apelon për kujdes gjatë qarkullimit, qëndrimin në radhë dhe respektimin me rigorozitet të rregullave të qarkullimit rrugor.

Në rast nevoje, apo për të denoncuar shkeljet e rregullave të qarkullimit që sjellin për pasojë ngadalësim apo bllokim të lëvizjes, telefononi në 112 dhe kontaktoni shërbimet e Policisë që janë në detyrë.

Pak më herët në një reagim në rrjetet sociale, Ministria e Infrastrukturës dhe Energjisë, njoftoi se për pastrimit e rrugës nga dherat dhe gurët u angazhuan 6 eskavatorë, 2 fadroma dhe disa punonjës.

Sipas ministrisë, arsyet e kësaj situate lidhen me reshjet e dendura të javëve të fundit dhe erozionin e theksuar të shpatit mbi rrugë.