Një qytetar gjobitet me 5 milionë lekë, policia tregon bilancin e 24 orëve

31 Mars 2020 - opinion

Një qytetar gjobitet me 5 milionë lekë, policia tregon bilancin e 24 orëve

Numri i shkelësve të masave të marra kundër përhapjes së koronavirusit ka rënë ndjeshëm në krahësim me javën e parë.

Por megjithatë ka ende nga ata që kanë sfiduar regjimin e karantinës dhe kanë lëvizur pa leje ose pa arsye emergjente. Madje ka patur edhe nga ata që janë futur pa leje në ambientet e urgjencës mjekësore.

Policia njofton se një qytetar është ndëshkuar me masë administrative 500 000 lekë, pasi është futur pa leje në ambientet e urgjencës mjekësore, për të parë familjarin e tij.

Në të gjithë vendin, nga strukturat e Policisë janë ndëshkuar me masë administrative 10.000 lekë, 157 shtetas, të cilët u konstatuan nga shërbimet e Policisë duke lëvizur në këmbë apo me biçikleta, pa ndonjë arsye apo emergjencë.

Gjatë 24 orëve të fundit, në të gjithë vendin, janë evidentuar 8 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit dhe bllokim mjeti, në zbatim të Aktit Normativ "Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″.

Në të gjithë vendin janë konstatuar 7 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.

Policia bën thirrje se nga sot e në vazhdim nuk do të lejohet asnjë këmbësor të dalë për shëtitje, aktivitet sportiv apo për motive të tjera, përveç emergjencave mjekësore dhe atyre që shkojnë në punë, të cilët duhet të kenë me vete kartën e identitetit dhe vërtetimin e punës nga punëdhënësi.

Për të bërë pazar në qendrat urbane, një pjesëtar i familjes duhet të aplikojë në e-Albania apo në numrin falas 55155, për t'u pajisur me autorizim, ndërsa pensionistët nuk lejohen në mënyrë kategorike të dalin nga banesa.

Shiteni Makinën Tuaj