Në gjendje të dehur tentojnë të korruptojnë efektivët e policisë, shkon në 70 numri i të arrestuarve

Sipas një njoftimi zyrtar, uniformat blu bëjnë me dije se kanë arrestuar një 42-vjeçar duke drejtuar automjetin në gjendje të dehur dhe i cili ka tentuar të korruptojë punonjësit e Policisë, duke i ofruar atyre shuma parash.

Policia njofton se numri i të arrestuarve lidhur me këtë vepër penale ka shkuar në 70.

“Gjatë kontrolleve parandaluese për rritjen e parametrave të sigurisë rrugore, shërbimet e Komisariatit të Policisë Rrugore kanë konstatuar 42-vjeçarin me iniciale M. G., duke drejtuar automjetin në gjendje të dehur.

42-vjeçari me qëllim shmangien e përgjegjësisë ligjore, ka tentuar të korruptojë punonjësit e Policisë, duke i ofruar atyre shuma parash.

Me këtë rast, ka shkuar në 70 numri i shtetasve të arrestuar të cilët kanë tentuar të korruptojnë punonjësit e Policisë”, njofton policia.
Policia thotë se lufta kundër këtij fenomeni të turpshëm do të intensifikohet, qoftë ndaj shkelësve, qoftë ndaj atyre që kryejnë korrupsionin pasiv, punonjësve të Policisë.