Moti i keq/ Përmbytje e rrëshqitje gurësh, Balluku: Të gjitha strukturat të angazhuara

Raport mbi situatën e krijuar nga moti i keq dhe masat e marra nga strukturat e MIE (Ora 13:00)

raporti derPrej mbrëmjes së djeshme, reshjet e shiut me intensitet të lartë kanë përfshirë të gjithë territorin e vendit, veçanërisht zonat veriore dhe verilindore. Strukturat nën varësinë e Ministrisë së Infrastrukturës dhe Energjisë janë angazhuar maksimalisht në monitorimin dhe menaxhimin e situatës, me ekipe të ngritura në gatishmëri për ndërhyrje të menjëhershme.

Grupet e punës së ARRSH dhe OSSH janë aktualisht në terren për të garantuar qarkullimin normal të automjeteve dhe furnizimin e pandërprerë me energji elektrike për abonentët.

 SITUATA NË AKSET RRUGORE

Zona Veriore dhe Verilindore

Në Tropojë, Kukës dhe në aksin Skurraj–Burrel, reshjet e shiut të shoqëruara me erë të fortë kanë shkaktuar rënie gurësh dhe inertesh në trupin e rrugës.

Ekipet e mirëmbajtjes kanë ndërhyrë menjëherë për pastrimin e akseve, duke garantuar qarkullim normal dhe pa bllokime.

Aksi Laç – Ura e Drojës

Për shkak të daljes së përroit nga shtrati është përmbytur një segment i rrugës. Po vijon puna për largimin e ujit nga karrexhata dhe rikthimin e qarkullimit normal.

Aksi Ersekë – Leskovik – 3 Urat

• Ka pasur rënie inertesh në trupin e rrugës.
• Janë marrë menjëherë masat për pastrimin e karrexhatës.
• Kompanitë e mirëmbajtjes janë të pranishme në terren me mjete dhe personel për garantimin e lëvizjes së sigurt.

FURNIZIMI ME ENERGJI ELEKTRIKE

Situata në Rrjetin e Shpërndarjes

• OSSH ka vënë në dispozicion rreth 1500 punonjës për menaxhimin e situatës.
• Aktualisht janë jashtë pune 26 fidera të rrjetit të tensionit të mesëm.
• Krahasuar me orët e para të situatës, furnizimi me energji elektrike në rang vendi është përmirësuar në rreth 70%.
• Në rajonet Shkodër, Dibër, Durrës, Vlorë dhe Berat furnizimi është plotësisht i normalizuar.
• Rrjeti që furnizon hidrovorët është funksional dhe pa defekte.

Rrjeti i Transmetimit

• Nuk raportohen avari apo defekte.
• Të gjitha linjat 400 kV, 220 kV dhe 110 kV janë në operim normal.

Situata në kaskadën e Drinit

• Pasditen e sotme pritet aktivizimi i një fronti të dytë reshjesh me intensitet të lartë në të gjithë basenin e lumit Drin.
• Parashikohet rënie reshjesh deri në 80 mm në basenin e Fierzës dhe rreth 130 mm në basenin Koman–Vau i Dejës.
• Në disa stacione reshjet mund të jenë edhe më intensive.
• Situata mbetet nën kontroll, dhe të gjitha grupet operative janë në gatishmëri të plotë.

 FURNIZIMI ME UJË TË PIJSHËM

• Situata në furnizimin me ujë paraqitet optimale në rang vendi.
• Nuk ka ndërprerje të energjisë elektrike në stacionet e pompimit, të cilat janë plotësisht funksionale.
• Në sistemet me gravitet janë marrë masat e nevojshme për menaxhimin e turbullirës gjatë procesit të klorinimit.
• Aktualisht janë në gatishmëri 40 grupe pune, mbi 50 mjete, si dhe ekipet mbështetëse të ndërmarrjeve të ujësjellës-kanalizimeve.

 SITUATA NË PORTET DHE AEROPORTIN E TIRANËS

Portet Detare

• Porti i Durrësit: Situata është e qëndrueshme dhe nën kontroll. Tragetet janë akostuar sipas orarit dhe përpunimi i anijeve vijon normalisht.
• Porti i Sarandës: Nuk janë raportuar problematika. Lundrimet drejt portit të Korfuzit kanë vijuar normalisht.

Aeroporti Ndërkombëtar “Nënë Tereza”

• Situata paraqitet e qetë dhe pa asnjë raportim për probleme apo ndërprerje të operimeve.

Të gjitha strukturat e agjencive te MIE janë të angazhuara plotësisht për menaxhimin e situatës. Vijon monitorimi intensiv në zonat me risk të shtuar, veçanërisht në basenin e lumit Drin gjatë orëve në vijim.

Probleme në Kolonjë për shkak të motit të keq, ndërhyhet për të pastruar inertet nga aksi Ersekë-Leskovik

Moti i i keq ka shkaktuar problematika edhe në Bashkinë Kolonjë.

Reshjet e shumta shkaktuar inerte në rrugë, në afërsi të fshatit Borovë në aksin nacional Ersekë-Leskovik.

Menjëherë autoritetet kanë ndërhyrë për të bërë të mundur pastrimin e rrugës. Pas punës intensive ky aks kalohet pa probleme.

Moti i keq përfshin vendin/ Ministria e Shëndetësisë plan masash për menaxhimin e situatës

Ministria e Shëndetësisë ka aktivizuar një plan të posaçëm masash për përballimin e situatës së krijuar nga reshjet intensive të shiut që kanë përfshirë disa zona të vendit që prej mbrëmjes së kaluar. Siç bëhet me dije përmjes një njoftimi për mediat, strukturat në varësi të Operatorit të Shërbimeve të Kujdesit Shëndetësor (OSHKSH) janë në gatishmëri të plotë 24 orë në ditë dhe po monitorojnë situatën në kohë reale.

Sipas njoftimit zyrtar, janë ndërmarrë një sërë masash parandaluese dhe reaguese në institucionet shëndetësore për të garantuar ofrimin e pandërprerë të shërbimeve për qytetarët. Këto masa përfshijnë:

• Monitorim i vazhdueshëm i situatës nga operatorët rajonalë të kujdesit shëndetësor & njësitë vendore
• Verifikim i infrastrukturës, pajisjeve dhe rezervave të medikamenteve
• Koordinim i ngushtë me pushtetin vendor dhe strukturat e emergjencave civile
• Aktivizim i plotë i shërbimeve spitalore të urgjencës

Po ashtu spitalet rajonale e bashkiake raportojnë se rezervat kritike (medikamente, material mjekësor, ujë të pijshëm, karburant për gjeneratorë) janë të siguruara dhe gati për përdorim.

Zonat më të prekura nga reshjet e dendura përfshijnë Kurbinin, Matin, Lezhën, Shkodrën, Malësinë e Madhe, Tropojën, Kukësin dhe Hasin. Megjithatë, sipas raportimeve nga terreni, aktualisht nuk ka problematika në ofrimin e shërbimeve shëndetësore në këto zona dhe strukturat funksionojnë normalisht.

OSHKSH mbetet në komunikim të pandërprerë me të gjitha njësitë për çdo rast emergjent që mund të kërkojë ndërhyrje të menjëhershme, duke garantuar një reagim të shpejtë dhe të koordinuar në çdo skenar të mundshëm.

Ministria e Shëndetësisë u bën thirrje qytetarëve të ndjekin udhëzimet e autoriteteve dhe të kontaktojnë shërbimet e urgjencës në rast nevoje. 

Moti i keq ‘pushton’ vendin/ Situata në Sarandë, nën kontroll

Situata nga moti i rënduar me shira të shumë në nënprefekturën e Sarandës është nën kontroll.

Informacioni në detaje është:

• Lumi i Bistricës deri tani është në shtratin e vet. Kjo pauzë pa shi ndihmon shumë dhe përballon 4 orë të tjera me shi pa ndërprerje.
• Nga bashkia Sarandë raportohet se hidrovori në Çukë është me kapacitet të plotë në punë pa ndërprerje.
• Nga bashkia Konispol raportohet se tek hidrovori në Butrint ka probleme. Para 1 ore ka rënë rrufeja tek izolatorët e Hidrovorit dhe për rrjedhojë është ndërprerë energjia elektrike në zonë. Grupet e OSHE janë në vend dhe po punohet për riparimin e difektit të shkaktuar nga rrufeja.
• Nga bashkia Delvinë nuk raportohen probleme nga situata me mot të rënduar.
• Nga bashkia Finiq raportohen probleme në fshatrat Navarricë dhe Livinë. Ka rrugë të bllokuara dhe shkarje dherash. Konkretisht në fshatin Navarricë ka dalë përroi nga shtrati dhe ka krijuar shumë probleme.

Grupet e emergjencave janë në terren.