Mercedes-Benz prezanton veturën e së ardhmes, të frymëzuar nga filmi “Avatar”

Me këtë koncept, Mercedesi dëshiron të tregojë mundësinë e ndërveprimit mes njeriut, makinerisë dhe natyrës.

Koncepti Mercedes-Benz Vision AVTR (Advanced Vehicle Transformation – "Automjeti i Avancuar Transformues") po cilësohet si një "organizëm i gjallë" i cili mund të lidhet me përdoruesit e vet dhe i cili ua mundëson ta ndjejnë botën përreth vetes.

Në fakt, koncepti AVTR me përdoruesin krijon një lidhje biometrike, ku duke vendosur dorën në konzolën që gjendet në mes të veturës ai mund të përcjellë të rrahurat e zemrës, ndërsa ekrani i lakuar krijon lidhjen vizuele të pasagjerit me botën e jashtme, transmeton Koha.net. Ndriçimi dhe dizajni i enterierit imitojnë shtëpitë e popullit Na'vi në filmin "Avatar".

Gjithashtu, ulëset, paneli i përparmë dhe dyshemeja janë të ndërtuar nga materiali i ri i recikluar, i tillë si lëkura e rreme "Dinamica" dhe druri "Karoon".

Mercedes-Benz Vision AVTR është një veturë tërësisht autonome dhe elektrike e cila ka katër motorë elektrikë me kapacitet në total prej 350 kW/476 kuajfuqi, të cilët përdorin teknologjinë e baterive organike të krijuara nga materialet e recikluara.

Me vetëm një mbushje të baterisë me kapacitet prej 110 kWh, koncepti Vision AVTR mund të udhëtojë deri rreth 700 kilometra. Po ashtu, duhet theksuar se ky koncept ka edhe sistemin e tërheqjes me të gjitha rrotat.

Vision AVTR, po ashtu, shpejtësinë nga 0 deri në 100 kilometra në orë mund ta arrijë për 4,3 sekonda ndërsa atë maksimale e ka të kufizuar në 160 km/h.

Gjithashtu, rrotat këtij koncepti i mundësojnë të lëvizë anash ose edhe në mënyrë diagonale.