Me shpejtësi deri në 174 km/h dhe të dehur në timon, pezullohen 118 patenta

Në një njoftim për mediat, bëhet me dije se gjatë 72 orëve të fundit, nga monitorimet me Poliscan, janë konstatuar automjete shpejtësi nga 150 km/h deri në 174 km/h, në zona ku shpejtësia maksimale e lejuar është 90 km/h.

Si rezultat i monitorimeve, gjatë 72 orëve janë pezulluar gjithsej 118 leje drejtimi, nga të cilat:

88 leje drejtimi janë pezulluar për qarkullim me shpejtësi deri në 174 km/h;

19 leje drejtimi janë pezulluar për drejtim mjeti, në efektin e alkoolit apo në gjendje të dehur;

11 leje drejtimi janë pezulluar për qarkullim në sens të kundërt.

Policia gjithashtu njofton se 12 drejtues mjetesh janë arrestuar, nga të cilët 7 për drejtim mjeti në gjendje të dehur dhe 5 për drejtim mjeti pa leje drejtimi.

Janë vendosur 2457 gjoba për shpejtësi mbi normën e lejuar; për shpejtësi dhe përdorim celulari; për shpejtësi dhe mosvënie të rripit të sigurimit; për shpejtësi, përdorim celulari dhe mosvënie të rripit të sigurimit gjatë drejtimit të automjetit; për parakalime të gabuara; mosvendosje të kaskës mbrojtëse etj.

Monitorimi me mjetet inteligjente vijon në të gjitha rrugët e vendit.