“Ka rrezikshmëri të lartë”/ Policia apel shoferëve: Shmangni lëvizjen në aksin Qafë Thore-Theth

Aksi rrugor Qafë Thore - Theth është bllokuar totalisht për shkak të rënies së ortekëve të dëborës dhe kushteve të përkeqësuara atmosferike. Për shkak të kësaj situate policia bën me dije se në këtë aks nuk do të lejohet qarkullimi i automjeteve, pasi rrezikshmëria është e lartë.

Qarkullimi do të qëndrojë i mbyllur deri në një moment të dytë për të gjitha automjetet, përfshirë edhe mjetet borëpastruese, pasi zona paraqet rrezik të lartë për kalim.

Policia ka bërë apel drejtuesve të makinave të shmangin këtë aks.

Njoftimi i policisë:

Bazuar në analizën e riskut dhe pas komunikimit me inxhinierët e firmës kontraktore për mirëmbajtjen e rrugës, dhe ARrSh-në, në segmentin rrugor “Qafë Thore – Theth”, për shkak të rrezikut nga ortekët e dëborës si pasojë e kushteve të përkeqësuara atmosferike, nuk do të lejohet qarkullimi i automjeteve, pasi rrezikshmëria është e lartë.

Ky segment rrugor do të mbahet i bllokuar deri në një moment të dytë. Për arsye sigurie, qarkullimi do të qëndrojë i mbyllur për të gjitha automjetet, përfshirë edhe mjetet borëpastruese, pasi zona paraqet rrezik të lartë për kalim.

U bëjmë thirrje drejtuesve të mjeteve të respektojnë sinjalistikën, të shmangin këtë aks dhe të ndjekin njoftimet zyrtare për përditësime të mëtejshme. 

Rënia e ortekëve të dëborës/ Bllokohet aksi Qafë Thore - Theth

Si pasojë e rënies së disa ortekëve masivë në zonën pranë tuneleve panoramike të aksit Qafë Thore – Theth, rruga këtë mëngjes është bllokuar plotësisht, duke e bërë të pamundur qarkullimin e çdo mjeti në këtë segment.

Masat e mëdha të dëborës dhe rreziku i vazhdueshëm për rrëshqitje të tjera kanë krijuar një situatë të rrezikshme për lëvizjen, sidomos në një nga akset më të frekuentuara turistike drejt Thethit.

Autoritetet vendore dhe strukturat e emergjencave civile bëjnë me dije se, për arsye sigurie, qarkullimi do të qëndrojë i pezulluar deri në një njoftim të dytë. Edhe mjetet borëpastruese nuk mund të ndërhyjnë aktualisht në zonë, për shkak të rrezikut të lartë nga ortekë të tjerë të mundshëm dhe kushteve të vështira atmosferike.

Burime nga terreni bëjnë të ditur se reshjet intensive të ditëve të fundit, të shoqëruara me temperatura të ulëta, kanë favorizuar krijimin e shtresave të paqëndrueshme të dëborës në shpatet malore, duke rritur ndjeshëm probabilitetin e rrëshqitjeve.

Zona pranë tuneleve panoramike konsiderohet një ndër pikat më problematike gjatë sezonit dimëror, për shkak të ekspozimit ndaj ortekëve. Institucionet u bëjnë thirrje drejtuesve të mjeteve të respektojnë sinjalistikën rrugore dhe të shmangin plotësisht këtë aks, duke zgjedhur itinerare alternative.

Gjithashtu, qytetarët dhe vizitorët këshillohen të ndjekin vetëm njoftimet zyrtare për çdo përditësim mbi situatën dhe rihapjen e mundshme të rrugës.