I dehur me 36 pasagjerë në autobus, pranga shoferit të linjës Korçë-Tiranë

Policia bën me dije se ai është arrestuar pas marrjes së një telefonate nga një qytetar, i cili denoncoi se 56-vjeçari po kryente manovra të rrezikshme në rrugë.

Efektivët kanë ndaluar mjetin në aksin rrugor Korçë-Pogradec, pranë vendit të quajtur Qafë Plloçë. Pas kontrollit të dokumentacionit dhe kryerjes së testit të alkoolit drejtuesit të mjetit, shtetasi A. M.,  rezultoi se po drejtonte autobusin nën efektin e pijeve alkoolike në masën 0.75 mg/l.

Në vijim të veprimeve procedurale, nga strukturat e lartpërmendura u bë arrestimi në flagrancë i shtetasit A. M., 56 vjeç, banues në Korçë, për veprën penale “Drejtimi i automjeteve në mënyrë të parregullt”.

Materialet i kaluan Prokurorisë pranë Gjykatës së Shkallës së Parë Pogradec për veprime të mëtejshme.