Fjalët i “merr era”, shifrat “flasin vetë”… Numri i aksidenteve gjatë verës u rrit

3 Shtator 2018 - Gazeta Shqiptare

Fjalët i “merr era”, shifrat “flasin vetë”… Numri i aksidenteve gjatë verës u rrit

“Forcuam regjimin e kontrollit në zbatimin e rregullave të qarkullimit rrugor, futëm komunikimin intensiv publik përmes konferencave javore të shtypit të drejtuesve të Policisë Rrugore, por edhe komunikimin në kohë reale në radiot, ndërmjet Policisë Rrugore dhe drejtuesve të mjeteve për t’i njohur ata me vështirësitë e lëvizjes e trafikut në orët kyç të tij.

Dhe natyrisht rezultati, është pozitiv, kemi gati 100 aksidente më pak dhe një ulje të ndjeshme të numrit të aksidenteve me pasoja".

Ishte kjo deklarata e Ministrit të Brendshëm, Fatmir Xhafaj nga Vlora këtë të shtunë në lidhje me aksidentet rrugore të ndodhura gjatë sezonit turistik.

E ndërsa fjalët i merr era, shifrat flasin vetë. Me numrin e viktimave në aksidente nuk mund të bësh politikë, por mjafton të bëjë çdo zyrtar punën. Atë punë që ministri Xhafaj e përmendi gjatë takimit me Kryeministrin.

E kur flasim për shifrat, situata është e zymtë.

Sipas një raporti nga NFOCIP, duke përdorur burime zyrtare dhe mediatike, vetëm gjatë muajit Gusht 2018 humbën jetën në aksidente rrugore 28 persona.

Krahasuar me Gushtin 2017, kjo shifër ka pësuar rritje me rreth 1/3 duke pasur parasysh se INSTAT ka raportuar vetëm 22 aksidente me pasoje humbjen e jetës në Gushtin e vitit të kaluar.

INSTAT akoma nuk ka bërë publike të dhënat zyrtare për muajin Gusht 2018, ku renditen si rregull edhe rastet e plagosjeve si pasojë e aksidenteve rrugore.

Sipas të dhënave të INSTAT, të bëra tashmë publike, në Korrik 2018 humbën jetën 18 persona, kurse në Qershor 2018 kanë humbur jetën si pasojë e aksidenteve rrugore 20 persona.

Sipas një verifikimi paraprak të INFOCIP të të dhënave të raportuara nga 4 burime mediatike serioze në vend rezulton se në Qershor 2018 kanë humbur jetën si pasojë e aksidenteve rrugore 21 persona, kurse në Korrik 2018 kanë humbur jetën 20 persona.

INFOCIP konstaton se në total për të tre muajt e verës 2018, në Shqipëri kanë humbur jetën si pasojë e aksidenteve rrugore 69 persona, krahasuar me 56 të aksidentuar me pasojë vdekjen në verën e vitit 2017 dhe konkretisht 12 persona në Qershor 2017, 22 persona në Korrik 2017 dhe 22 persona në Gusht 2017 (burimi: INSTAT).

Numri i lartë i aksidenteve nuk është vetëm në dorën e Policisë Rrugore, por ka rol kyç në parandalimin e tyre.

Shiteni Makinën Tuaj