Durrës Marina hap shitjet “në ajër” dhe për godinat 10 e 11! Çmime që kalojnë 3 mijë euro për m2

Sipas zyrës së shitjes çmimet mesatare për shitjen e apartamenteve, në godinat 10 dhe 11 për të cilat pritet të nisin shitjet, do të nisin nga 2,500 euro për metër katror. Ndërsa çmimet maksimale do të nisin nga 3,000 dhe do vijojnë mbi 3,000 euro për metër katror. Krahasuar me shitjet e mëparshme çmimet minimale të apartamenteve pritet të rriten 25%.

Sipas të dhënave të marra nga zyra e shitjen në ankandin e mëparshëm, që u mbajt më 18 korrik 2024 për apartamentet e rezidencës “Parkpoint” totali i çmimit të shitjes së pronës me sipërfaqe neto prej 60 m2 varionte nga 120 mijë euro deri në 180 mijë euro apo nga 2,000 deri në 3,000 euro për metër katror sipas vendodhjes dhe pozicionit. Apartamentet e godinën me afërsi 200 metra nga deti.

Çmimet e shitjeve për ndërtesat në projektin e “Durrës Yacht Marina” kanë shënuar rritje progresive, në vlera nga 150, 200 deri 500 euro për metër katror.

Në ankandin e parë të zhvilluar në muajin Qershor 2023 çmimet e apartamenteve për godinat e para nisën nga 1,650 deri 1,750 euro për metër katror.

Nga ankandi i parë deri në ankandin e radhës rritja e çmimeve rezulton të jetë 51%.

Më pas në muajin mars 2024 u hap një tjetër ankand e shitjes së pasurive të paluajtshme. Sipas zyrës së shitjes çmimi minimal i shitjes për metër katror niste nga 1,900 euro deri në vlerat maksimale prej 2,600 euro për metër katror, të përcaktuara në varësi të katit të apartamentit dhe pozicionimit të tij me pamje nga deti dhe pishina. Çmimet minimale të shitjes u rritën 15%.

Rritje të çmimeve është shënuar edhe për pronat që do dolën në shitje më 18 Prill 2024 të ndërtesës 7 katesh në rezidencën “Parkland”. Nga zyra e shitjeve u pohua se apartamentet me sipërfaqe neto nga 61 m2 deri 141 m2 totali i vlerës së shitjes varionte nga 110 mijë euro deri 400 mijë euro. Çmimet për metër katror nisin nga 1,800 deri 2,800 euro. Çmimet maksimale u rritën rreth 8%.

Shitja vijon me skemën e pagesës së prenotimit prej 1,200 euro dhe shlyerjen e totalit të vlerës së blerjes së apartamentit nëpërmjet 7 kësteve. Tarifa e paguar për prenotim nuk kthehet, por blerësit i llogaritet në këstin e fundit të pagesës. 3 prej këtyre kësteve apo 40% e vlerës së apartamentit do të paguhet para marrjes së lejes së ndërtimit e ndarë në 20% e çmimit të blerjes që paguhet brenda 5 ditëve nga nënshkrimi i Marrëveshjes.

Projekti ka marrë statusin strategjik, pas të cilit shteti shqiptar u bë bashkë aksioner, pasi në dispozicion të projektit u vunë 80 hektarë tokë shtetërore. Si investitorë kompania ka përfituar lehtësi të shumta si përjashtimi nga taksa e infrastrukturës në ndërtim (4% e vlerës së shitjes dhe taksa e strehimit prej 3%).

Gjithsej, parashikohet ndërtimi i gati 13 mijë apartamenteve (4 mijë në fazën e parë dhe rreth 8,600 në fazën e dytë), ndërsa do të këtë vetëm pak hotele me më shumë se 850 dhoma. Parashikohen vetëm 280 vende për jahte. 93% e sipërfaqes së ndërtimit të parashikuar do të jetë rezidenciale dhe nga 3.5% përkatësisht do të jenë hotele dhe sipërfaqe tregtare.

Sipas bilancit,“Durrës Marina sha”, kompania që po menaxhon projektin strategjik të Marinës së jahteve në Durrës, ka arkëtuar nga klientët rreth 22 milionë euro në vitin 2023, ndonëse ndërtimi i apartamenteve në pjesën më të madhe nuk kishte filluar.

E dhëna bëhet e ditur në bilancin e vitit 2023 të kompanisë, ku zëri “Detyrime nga kontratat me klientë” është 2.2 miliardë lekë, ose rreth 22 milionë euro. Ky zë, sipas bilancit, përfshin: “detyrimet nga kontratat me klientët janë detyrime për të transferuar njësitë ndërtimore tek klientët për të cilat Shoqëria ka marrë një parapagim”.

Ndonëse kompania u paraqit si investitore, ajo rezulton se po i arkëton paratë nga parapagimet e klientëve, të cilat janë një “komponent i rëndësishëm i financimit”, siç thuhet në raportin e audituesve të pavarur.

“Përgjithësisht, Shoqëria arkëton parapagime afatgjata nga klientët. Shoqëria ka arritur në përfundimin që për këto kontrata kemi përfshirjen e një komponenti të rëndësishëm të financimit”.

Sipas raportit, “Gjatë kohës që prona është në proces ndërtimi Shoqëria arkëton parapagime nga klientët sipas kushteve të kontratës të cilat njihen si njihen si detyrime kontraktuale dhe jo si te ardhura, për arsyen e kohës së njohjes së të ardhurave”.

Ndërkohë, kompania thotë në raportin vjetor 2023 se procesi i ndërtimit nuk kishte nisur akoma.

Shoqëria, sipas raportit, ka shpenzuar gjithsej rreth 8 milionë euro për zhvillimin e projektit Durrës Yachts & Marina deri më 31 dhjetor 2023, nga të cilat rreth 5 milionë euro kanë qenë kostot e projektimit dhe pjesa tjetër për inventarë.