Akuza/ 7 të arrestuar, mes tyre zyrtarë të Drejtorisë së Transportit Rrugor
Shtatë persona janë arrestuar nga Policia dhe një tjetër është shpallur në kërkim pasi akuzohen se merrnin shuma të ndryshme parash për të falsifikuar dokumentet për xhamat e zinj të makinave.
Mes të arrestuarve janë disa zyrtarë të Drejtorisë së Transportit Rrugor, si dhe një mjek familjeje. Arrestimi i tyre është bërë pas lëshimit të urdhër-arresteve nga Prokuroria e Tiranës.
Sipas autoriteteve, zyrtarët e Transportit Rrugor dhe mjeku i familjes u premtonin dhe u siguronin disa shtetasve nga Tirana dhe Durrësi certifikata përshtatshmërie për xhamat e errësuar të automjeteve, kalimin e kontrollit teknik të mjeteve dhe pajisjen me dokumente mjekësore për mospërdorimin e rripit të sigurimit, kundrejt shpërblimit monetar nga 10.000 – 30.000 lekë të rinj.
