Aksidenti i autobusit të Kosovës, mediat kroate ndërtojnë skemën 3D

Aksidenti i autobusit të Kosovës, mediat kroate ndërtojnë skemën 3D

Mediat kroate kanë ndërtuar në 3D videon e aksidentit të rëndë, që u mori jetën 10 shqiptarëve të Kosovës e ku më shumë se 15 prej tyre mbetën të lënduar rëndë.

Sipas këtij projeksioni të bazuar në raportet e policisë, shihet autobusi që del nga rruga dhe pas disa devijimesh përmbyset jashtë saj në një zonë të gjelbëruar. (VIDEO 3D)

Paraprakisht u tha se aksidenti ka ardhur si pasojë e lodhjes së shoferit, ndërsa ky i fundit, tashmë nën arrest, ka deklaruar se e ka zënë gjumi. Autobusi i linjës Frankfurt-Prishtinë është aksidentuar në Kroaci, rreth orës 6 të mëngjesit. Ende nuk janë identifikuar trupat e viktimave, ndërsa Kryeministri Kurti dhe anëtarë të tjerë të qeverisë kanë mbërritur në Kroaci.

I mbijetuari nga aksidenti: Shumicën e trupave i kemi largu vetë

Mediat kroate kanë publikuar tashmë intervistat e para të personave që i mbijetuan aksidentit në autobusin e linjës Frankfurt-Prishtinë, ku humbën jetën 10 persona. Një prej të mbijetuarve është dhe Fidan Hajdari i cili nuk mundet t’i mbajë lotët ndërsa tregon momentet e tmerrit në autobus.

Mjeti ka dalë nga rruga dhe është përmbysur rreth orës 6;00 të mëngjesit, kur pjesa më e madhe e pasagjerëve kanë qenë në gjumë.

“Vetëm kam udhëtu, nuk e kam pasë askënd të familjes. Rasti ka ndodhur në 6 në mëngjes, shumica kemi qenë në gjumë, ka ndodhur një aksident shumë i shpejtë. Arsyet e aksidentit është mirë me i dhënë policia, unë për vete kam qenë në gjumë nuk mund të supozojë. Më ka dalë gjumi, e kam pa që jemi duke u përplasur por se kemi pritur që ka me qenë kaq tragjik. Fati që kemi shpëtuar shumica, fati i keq është që 10 prej neve nuk ia kanë dalë. Autoritetet kroate i kisha falenderu kanë bërë një punë shumë të mire”, tha Hajdari për mediumin kroat sbplus.hr.

Ai ka pohuar ndër të tjera se një pjesë të trupave të pajetë I kanë larguar vetë nga autobusi i përmbysur.

“Kam qenë në pjesën e mesme të autobusit në katin e sipërm. Po, shumicën prej tyre i kemi largu vetë trupat… E kam lajmëru familjen, janë informu edhe prej mediave”, tregoi ai.