Aksident rrugor në Korçë – Maliq, përplasen 2 makina, 3 të plagosur

Ngjarja ka ndodhur në vendin e quajtur "Gryka e Pocestës" si pasojë e përplasjes së 2 makinave.

Sipas policisë rrugore, njëri nga mjetet ka qenë duke lëvizur nga një shesh pushimi në anë të rrugës për të kaluar në aksin nacional kur është përplasur nga një mjet me targa greke që po lëvizte në drejtim të Maliqit.

Goditja ka qenë e fortë aq sa mjeti me targa shqiptare ka bërë disa rrotullime në rrugë duke sjellë edhe plagosjen e tre personave që ishin në mjet.

Sipas policisë mjeti që po lëvizte nga Kapshtica në drejtim të Maliqit ka qenë duke udhëtuar me shpejtësi tej normave të lejuara, duke mos shmangur dot përplasjen. Policia ka mbërritur në vendin e ngjarjes dhe po heton për shkaqet e këtij aksidenti.

Del nga rruga e përfundon në kanal një automjet në aksin Lushnje-Berat

Një automjet është përmbysur pasi ka dalë nga rruga në aksin nacional Lushnje-Berat, pranë fshatit Kashtëbardhë.

Drejtuesi i tij, një 35-vjeçar nga Kuçova, nuk ka arritur që të marrë kthesën për shkak të shpejtësisë në lëvizje dhe ka përfunduar në kanalin buzë rrugës.

Ai është dërguar për mjekim në spitalin e Lushnjes ku ndodhet jashtë rrezikut për jetën pasi ka marrë plagë të lehta.

Ndërkohë, në vendngjarja ka shkuar policia rrugore e cila po punon për zbardhjen e shkaqeve të këtij aksidenti.