Aksident i frikshëm në Rrugën e Kombit, një makinë përfshihet nga flakët. Plagosen disa persona

29 Dhjetor 2021 - Gazeta Shqiptare

Aksident i frikshëm në Rrugën e Kombit, një makinë përfshihet nga flakët. Plagosen disa persona

Një aksident i trefishtë është regjistruar sot në Rrugën e Kombit. Ngjarja ndodhi në aksin Milot-Rrubik.

Për pasojë disa persona raportohet se kanë mbetur të plagosur, ndërsa nuk dihet numri i saktë. Siç shihet edhe nga pamjet e siguruara nga gazetari Elidon Ndreka, një makinë ka shpërthyer në flakë.

Ndërkohë disa kalimtarët të rastit i kanë dhënë ndihmë të plagosurve, duke i nxjerrë nga mjetet që janë dëmtuar thuajse totalisht.

Detajet/ Makina u përfshi në flakë pas aksidentit të trefishtë në Milot-Rubik, vdes tragjikisht fëmija 3 vjeç

Të tjera detaje tragjike dalin në dritë në lidhje me aksidentin e frikshëm sot në aksin Milot-Rrubik, ku janë përfshirë 3 makina.

Mësohet se në një prej makinave që u përfshi edhe nga flakët, i lënduar mbeti një fëmijë 3 vjeç, i cili humbi jetën pak minuta më vonë pas ngjarjes. Ky i fundit ishte ulur në pjesën e pasme të pasagjerit.

Ndërkohë, gazetari Elidon Ndreka raporton për BalkanWeb se një person tjetër është plagosur rëndë. Deri më tani nuk dihet identiteti i të plagosurit, si dhe rrethanat e aksidentit që rezultoi tragjik për fatin e vogëlushit.