Sistemi i pagesës për aksin rrugor Thumanë-Kashar, reagon Ministria e Infrastrukturës

1 javë, 3 ditë më parë - 9 Korrik 2024, opinion
Sistemi i pagesës për aksin rrugor Thumanë-Kashar, reagon Ministria e Infrastrukturës
Ministria e Infrastrukturës dhe Energjisë deklaron se sistemi i pagesës për aksin rrugor Thumanë – Kashar do të nisë zyrtarisht në ditët në vazhdim dhe se publiku do të njoftohet paraprakisht për datën dhe orarin e fillimit të pagesës.

Kjo është njoftuar nga ministria, pasi kompania koncensionare që menaxhon segmentin pjesë të Korridorit Blu, ka kryer test të përkohshëm në sistemin e toll-eve.

“Deri në nisjen e këtij procesi, kompania do të kryejë në segmente të ndryshme kohore, testime të kufizuara të sistemit të pagesës, për të kolauduar sistemin dhe aftësinë përpunuese të stafit. Lidhur me orarin e këtyre testimeve publiku do të njoftohet 24 orë më përpara.

Pagesa për kalimin në këtë aks do të jetë 2.1 euro pa TVSH, ose ekuivalenca e saj në lekë sipas kursit zyrtar të këmbimit të Bankës së Shqipërisë, në datën e fillimit të operimit të sistemit të pagesës”, njofton Ministria.

Ministria e Infrastrukturës dhe Energjisë kërkon mirëkuptimin e qytetarëve gjatë fazës së kolaudimit, pasi ky aks rrugor u hap përpara afatit për t’i dhënë frymëmarrje qarkullimit dhe për të lehtësuar trafikun në akset e veriut si dhe për të ndihmuar qytetarët që qarkullojnë në këto akse.

Support Ukraine