Rruga dytësore Plepa-Golem “peng” i vonesave/ Banka Botërore: Të ulet pjesa e nënkontraktimit!

Makthi i trafikut në Plepa-Golem u mendua se do të zgjidhej falë kësaj ndërhyrjeje e cila u mirëprit në atë kohë sidomos nga bizneset e turizmit dhe agroturizmit që janë në këtë zonë.

Por duket se këto pritshmëri u thyen teksa rruga që duhet të kishte mbaruar vijon të mbetet ende një kantier i hapur ku ecet me hapa minimalë. Operatorët turistikë raportojnë se iu duhet të kalojnë në trafik me mjetet e transportit të turistëve deri në 2-3 orë në disa raste ndërkohë që për ata që nisen drejt aeroportit të Tiranës dalja bëhet 5 orë para orarit të check-in.

Kjo rrugë bën pjesë në projektin për ndërlidhjen e rrugëve rajonale dhe lokale ku përfshihen edhe një sërë aksesh të tjera në pesë bashki dhe që të gjitha kanë përparuar mirë sipas kalendarit. Banka Botërore e cila është mbështetëse e këtij projekti në raportin e fundit të rishikuar për ecurinë publikuar në 7 korrik 2022 pohon se shkak për vonesat në Plepa-Golem është bërë kompania zbatuese. Nga ajo që shkuan banka duket se firma që ka fituar tenderin e ka kaluar atë me nënkontraktim dhe ky i fundit duket se nuk ka ecur sipas parashikimeve.

“Durrës, rikonstruksioni i rrugëve të shërbimit Plepa – Golem në të dy anët e autostradës Durrës – Kavajë. Kontrata u nënshkrua në korrik 2021 për periudhë njëvjeçare zbatimi. Këto rrugë do të ofrojnë akses më të sigurt të trafikut në autostradën kryesore mes Durrësit dhe Kavajës dhe komunikim më të mirë mes fshatrave në kodrat rrotull/zonave bujqësore dhe me zonat turistike/rekreative të vijës bregdetare. Punimet e rindërtimit nuk parashikojnë asnjë shpronësim. Pas pesë muajsh nga nënshkrimi i kontratës kontraktori (duke nënkuptuar vonesa nga nënkontraktori) nuk është mobilizuar plotësisht dhe progresi i punimeve është minimal. Ekipi i Bankës theksoi nevojën për të forcuar mekanizmin monitorues të mbikëqyrësit, veçanërisht për sa i përket nivelit të nënkontraktimit (të mos kalojë një përqindje të caktuar) dhe përgjegjësisë së kontraktorit kryesor dhe llogaridhënien e tij për zbatimin e punimeve të rikonstruksionit sipas planit të zbatimit” thuhet në dokument.

Projekti për ndërlidhjen e rrugëve lokale dhe rajonale nisi zbatimin në vitin 2018 teksa u mbështet me një kredi 50 milionë dollarë nga Banka Botërore dhe parashikohet që të zgjasë deri në fund të këtij viti. Në përbërje të tij janë tre komponentë ku pjesën kryesore e zë përmirësimi i aksesit me një vlerë 46.88 milionë USD. Pjesa tjetër e komponentëve janë asistencë për mbështetjen e kapaciteteve të bashkive, zbatimit të projektit dhe një tarifë prej 120 mijë dollarësh pjesë e projektit.