Rrezikuan pushuesit,gjobiten../Bllokohet një gomone e një Jet Ski në Radhimë e Tale

Policia Kufitare apelon për të gjithë përdoruesit e mjeteve lundruese, që të respektojnë me rigorozitet perimetrin e sigurisë ujore për pushuesit, të zbatojnë rregullat për përdorimin e mjeteve lundruese dhe të respektojnë zonat e përcaktuara për lundrim me këto mjete.

Gjithashtu, fton qytetarët që për çdo rast të shkeljes së perimetrit të sigurisë dhe të përdorimit të mjeteve lundruese në mënyrë të parregullt, të denoncojnë në numrin 112, duke iu garantuar reagim të menjëhershëm.

Kreu manovra të rrezikshme me mjet lundrues, brenda perimetrit të sigurisë, ndëshkohet me masë administrative 100 000 lekë, 24-vjeçari.

Sekuestrohet mjeti lundrues.

Shërbimet e Drejtorisë Vendore të Policisë Lezhë dhe shërbimet e Policisë Kufitare në Shëngjin, gjatë monitorimit të vijës bregdetare, kanë konstatuar në plazhin e Tales, një mjet lundrues tip Jet Ski, që po lëvizte në mënyrë të rrezikshme brenda perimetrit të sigurisë, duke rrezikuar pushuesit.

Shërbimet e Policisë ndaluan menjëherë mjetin lundrues dhe shoqëruan në Stacionin e Policisë Kufitare Shëngjin, drejtuesin e tij, shtetasin D. L., 24 vjeç.

Në përfundim të veprimeve, drejtuesi i mjetit lundrues u ndëshkua me masë administrative 100 000 lekë, si dhe u sekuestrua mjeti lundrues.

Shërbimet e Policisë Kufitare, në bashkëpunim me shërbimet e Drejtorisë Vendore të Policisë Lezhë, do të vijojnë kontrollet intensive përgjatë gjithë vijës bregdetare, ndërsa u bën apel të gjithë shtetasve që përdorin ose japin me qira mjete lundruese argëtuese, që të respektojnë me rigorozitet rregullat dhe detyrimet ligjore, me qëllim garantimin e sigurisë së jetës së pushuesve në plazhe.

Aksident me Jet Ski në Golem, arrestohet 21 vjeçari

Policia ka arrestuar një 21-vjeçar dhe ka nisur procedim në gjendje të lirë ndaj dy personave të tjerë, pas aksidentit në det të ndodhur pasditen e së dielës në zonën e Golemit, ku u përplasën dy Jet Ski.

Të proceduarit janë pronari, administratori dhe një punonjës i subjektit që jepte me qira mjetet lundruese.

Hetimet kanë zbuluar se drejtuesit e mjeteve nuk kishin leje për këtë kategori, ndërsa përplasja ndodhi rreth 800 metra nga bregu, jashtë perimetrit të sigurisë.

Policia Kufitare ka reaguar mbi ngjarjen, duke deklaruar: “Kontrollet ushtrohen rregullisht në gjithë vijën bregdetare. Sapo patrullat tokësore apo detare konstatojnë shkelje, ato penalizohen menjëherë. Në rastin konkret, nuk është konstatuar gjatë daljes në det, por vetëm pas ngjarjes.”

Personat e proceduar do të përballen me akuzën “shkelja e rregullave të mbrojtjes në punë”. Ndërkohë, i plagosuri ndodhet jashtë rrezikut për jetën, ndërsa hetimet për ngjarjen vazhdojnë.