"Hapet të premten tuneli i Llogarasë"/ Balluku: Ditë e madhe për turizmin shqiptar

Balluku njoftoi se tuneli i Llogarasë do të hapet të premten për udhëtarët.

““Jemi në momentet e fundit të përfundimit të tunelit të Llogarasë. Parashikohet që pasnesër, në datë 5, ditë e premte, në orën 10, do të jetë momenti i hapjes së këtij tuneli. Sigurisht në kantier do të vazhdohet puna, pasi po dorëzohet para afatit, ashtu siç kemi bërë tashmë me të gjitha veprat tona të mëdha infrastrukturore, por tuneli i Llogarasë ka një vlerë tjetër edhe për historikun e infrastrukturës shqiptare. Unë e quaj një gur kilometrik, pasi bëhet fjalë për një tunel i cili është 5.9 kilometra i gjatë, dhe është një nga veprat infrastrukturore të kategorisë së rëndësishme përsa i përket tuneleve edhe në rang Europe. Futet në tunelet e gjatësisë së madhe”, u shpreh ajo.

Ministrja tha se do të ketë njësi të dedikuar të Policisë Rrugore në tunelin e Llogarasë, që kontrollon fluksin e trafikun, ndërsa do të kryhen edhe kontrolle me radarë.

“Duke pasur parasysh që ky është një tunel totalisht modern nga ana e konstruksionit, por nga ana tjetër duhet të keni parasysh se është një tunel i menaxhuar në mënyrë elektronike, dixhitale. Në hyrje, në anën e Dukatit kemi të vendosur qendrën e monitorimit të këtij tuneli, një qendër totalisht e ngritur mbi dixhitalizimin që në të ardhmen mendojmë që të përdorim dhe inteligjencën artificiale për të menaxhuar të gjithë flukset e tunelit, për të kontrolluar sigurinë rrugore brenda këtij tuneli”, tha ajo.
Balluku theksoi se gjatë dimrit tuneli do të mbyllet për të vijuar me disa punime të tjera.

“Tuneli i Llogarasë është projektuar nga një kompani evropiane. Kemi hapur garë ndërkombëtare. Gjatë dimrit, tuneli i Llogarasë do të mbyllet, për t'u rihapur sezonin tjetër”, nënvizoi ministrja.