Togat e zeza pranuan kërkesën e SPAK për dënimin e tij me 9 muaj burg, por iu ul në 6 muaj pasi përfitoi nga gjykimi i shkurtuar.
Ky dënim përfundimisht iu konvertua në 900 mijë lekë gjobë, pagesë e cila duhet të kryhet brenda nje afati 10 ditor pasi vendimi të marrë formë të prerë.
Deputeti demokrat Qani Xhafa më 11 Mars 2023, duke drejtuar në gjendje të dehur automjetin tip Toyota me targa AB 457 IJ, në Bulevardin “Qemal Stafa”, Elbasan humbi kontrollin dhe doli nga rruga duke u përplasur me një shtyllë të ndriçimit rrugor.
“Nga tërësia e veprimeve hetimore ka rezultuar se më 11 mars 2023, i pandehuri Qani Xhafa, aktualisht Deputet në Kuvendin e Shqipërisë, duke drejtuar në gjendje të dehur automjetin tip Toyota me targa AB 457 IJ, në Bulevardin “Qemal Stafa”, Elbasan ka humbur kontrollin dhe ka dalë nga rruga duke u përplasur me një shtyllë të ndriçimit rrugor. Nga aksidenti janë shkaktuar dëme të lehta materiale”, tha SPAK ne nje njoftim te 4 muajve me pare.
Kujtojmë se Qani Xhafa mori mandatin e deputetit, pasi Luçiano Boçi u largua nga Parlamenti për garuar për kryetar Bashkie të Elbasanit.
NJOFTIM PËR MEDIAT
1. Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Dërgimin në gjyq të çështjes penale që i përket
procedimit penal nr. 27, të vitit 2025, në ngarkim të të pandehurit Qani Xhafa, i akuzuar për kryerjen e veprës penale “Drejtimi i automjeteve në mënyrë të parregullt”,
parashikuar nga neni 291 i Kodit Penal.
2. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e
Organizuar me trup gjykues të përbërë nga gjyqtarja Irena Gjoka, me vendimin Nr. 43, datë 19.06.2025 vendosi:
1. Deklarimin fajtor të të pandehurit Qani Xhafa për kryerjen e veprës penale “Drejtimi i automjeteve në mënyrë të parregullt“, parashikuar nga neni 291 i Kodit Penal dhe dënimin e tij në bazë të kësaj dispozite me 9 (nëntë) muaj burgim.
2. Në aplikim të nenit 406 paragrafi 1 të Kodit të Procedurës Penale, të pandehurit Qani Xhafa, i zbritet 1/3 e dënimit, duke u dënuar përfundimisht me 6 (gjashtë)
muaj burgim.
2.1. Në aplikim të nenit 53/a dhe 291, pika 2 e Kodit Penal, zëvendësimin e dënimit me burgim prej 6 (gjashtë) muajsh, me pagimin e një shume të hollash në favor të shtetit, prej 900.000 (nëntëqind mijë) lekësh, duke llogaritur një ditë burgim me
pesë mijë lekë, e cila duhet të paguhet brenda 10 ditëve nga momenti që vendimi merr formë të prerë.
3. Bazuar në nenin 261/b, 389 të K.Pr.Penale heqjen e masës së sigurimit personal “detyrimi për tu paraqitur në policinë gjyqësore” caktuar me vendimin nr. 184 datë 13.03.2023 të Gjykatës së Shkallës së Parë të Juridiksionit të Përgjithshëm
Elbasan.
4. Shpenzimet procedurale të kryera gjatë fazës së hetimeve (sipas formularit përkatës), si dhe shpenzimet gjyqësore sipas formularit bashkëlidhur, i ngarkohen të pandehurit.
5. Kundër këtij vendimi lejohet ankim nga palët brenda pesëmbëdhjetë ditëve, në Gjykatën e Posaçme të Apelit për Korrupsionin dhe Krimin e Organizuar, duke filluar ky afat nga dita e nesërme e njoftimit të këtij vendimi.
Tiranë, më datë 19.06.2025
Gjykata e Posaçme e Shkallës së Parë për Korrupsionin dhe Krimin e Organizuar
Lajmet përkatëse
