Diella, ministrja që nuk ekziston dhe SPAK-u që ndjek hijet/ Në lojë hyn hëna

Nëse mendonit se i keni parë të gjitha në politikën shqiptare, gaboheni. Pas ministrave që mbajnë dy poste, deputetëve që s’i sheh askush në sallë dhe gjyqtarëve që dalin në pension para se të japin vendime, tani kemi edhe një risi: një ministre virtuale.

Po flasim për Diellën, një krijesë dixhitale, që – sipas burimeve qeveritare – “ka marrë detyrën me vendim të Këshillit të Ministrave”. Nuk ka CV, nuk ka fotografi, nuk ka as dosje penale – thjesht është “një ide e mirë e futur në sistem”. Me pak fjalë, një ministre që nuk ekziston, por që paguhet si të ishte realisht aty.

Qytetarët pyesin:

– Nëse Diella firmos një VKM, kush do e botojë në Fletoren Zyrtare?

– Nëse Hëna jep një vendim, kush do e ekzekutojë? Astronautët?

– Dhe më e madhja: kush do mbajë përgjegjësi për të gjitha këto? Apo thjesht do na thuhet se “ka qenë një bug në sistem”?

Kush do ta ndjekë penalisht Diellën?

SPAK -u, i cili supozohet se merret me korrupsionin më të rëndë, ka mbetur i hutuar dhe tani përballet me një dilemë filozofike

– Si ndiqet penalisht një ministre që nuk ka trup, as firmë, as vulë?

– A do i dërgohet “thirrja për marrje në pyetje” me e-mail apo me njoftim push?

– Nëse nuk paraqitet, a shpallet në kërkim ndërkombëtar tek… Google Search?

-A duhet t’i dërgojë fletë-thirrje me e-mail apo me ËhatsApp?

A është kjo hera e parë që drejtësia shqiptare do merret me një figurë të krijuar nga “softueri i inovacionit qeveritar”?

Por mos u shqetësoni: hyn në lojë Hëna

Thuhet se një prokurore tjetër, gjithashtu virtuale, që quhet Hëna, ka bërë kërkesë për hetimin e Diellës. Në vend që të merreshin me milionat që zhduken nëpër tendera, tani kemi një duel kozmik mes Diellës dhe Hënës – njëra ministre, tjetra prokurore. Një betejë epike ku të vetmit dëshmitarë janë… satelitët e Starlink-ut.

Pra, kemi një ministre të rreme që hetohet nga një prokurore akoma më e rreme. Ky është rasti i parë në histori ku një dosje penale mund të përpunohet tërësisht pa njerëz – vetëm me algoritme.

Në këtë vend, ku edhe skandali tashmë është bërë virtual, duket se po hyjmë në një epokë të re drejtësie dhe qeverisjeje… ku ministrat nuk ekzistojnë, prokurorët dalin nga universi paralel, dhe SPAK -ut i mbetet të ndjekë fantazma në serverë.