Bllokohen 298 ton karburant, ishte jashtë standardeve

4 vjet, 5 muaj më parë - 22 Tetor 2019, opinion
Bllokohen 298 ton karburant, ishte jashtë standardeve
298 ton karburant janë bllokuar në një vendburim në Bashkinë Finiq nga ana e Inspektoratit Shtetëror Teknik dhe Industrial, në bashkëpunimin me Drejtorinë e Përgjithshme të Doganave.

Nga verifikimet e bëra nga autoritet u konstatua se mungonte vërtetimi teknik, si dhe u evidentuan probleme me cilësinë e produktit.

Aksioni i sasisë së karburantit u ndoq nga afër nga Belinda Balluku, Ministrja e Infrastrukturës dhe Energjisë, kryeinspektori i ISHTI, Admir Abrija dhe zëvendësdrejtorin e Doganave, Ylber Kalaja.

“Inspektorati Shtetëror Teknik dhe Industrial në kuadër të planit antiinformalitet, bashkë me administratën doganore, bën një plan kontrolli dhe gjatë kontrollit kemi konstatuar 298 ton produkt, lëndë e parë, naftë bruto, e cila është e stokuar në këtë vendburim, pa vërtetimin teknik. Menjëherë kemi njoftuar administratën doganore që të hetojë në lidhje me fiskun e produktit”, bëri të ditur kryeinspektori Abrija.

Përsa i përketë karburantit të bllokuar, zëvendësdrejtori i Doganave u shpreh se është produkt me risk dhe me shkallë monitorimi shumë të lartë.

“Për vetë parametrat që kanë rezultuar, ky produkt rezulton të jetë një ndër produktet me risk dhe me shkallë monitorimi shumë më të lartë, për vetë mundësinë e përdorimit dhe si lëndë djegëse për ngrohje apo për elementë të tjerë. Jemi në pritje të rezultateve përfundimtare të analizave për të vijuar me procedurat e tjera në koordinim me strukturën e ISHTI-t”, tha Kalaja.

Support Ukraine