Bllokimi i monopatinave/ Policia: Sekuestrohen mbi 1300 skutera elektrikë

Sipas të dhënave zyrtare qe nga 13 tetori kur u dha urdhri nga ministria e brendshme dhe deri tani policia ka  bllokuar gjithsej 1462 mjete elektrike, prej të cilave 1336 janë monopatina dhe 126 janë motorë elektrikë.

Kjo masë është marrë pas shtimit të ndjeshëm të përdorimit të mjeteve elektrike në qytetet e mëdha, që shpesh kanë shkaktuar situata të rrezikshme në trafik dhe përplasje me këmbësorët apo automjetet e tjera.

Autoritetet janë duke përgatitur një rregullore të re, e cila do të përcaktojë qartë kushtet dhe kufizimet për përdorimin e monopatinave dhe mjeteve të tjera elektrike. Sipas burimeve nga Ministria e Brendshme, pritet që mosha minimale për drejtimin e monopatinës të jetë 16 vjeç, ndërsa shpejtësia maksimale e lejuar do të jetë 25 kilometra në orë, vetëm brenda qyteteve.

Përdorimi i kaskës mbrojtëse do të jetë i detyrueshëm për të gjithë drejtuesit, ndërsa qarkullimi i monopatinave do të ndalohet në rrugët interurbane, autostrada apo zona ku mungojnë korsitë e dedikuara për biçikleta dhe mjete elektrike. Në vijim, pritet që ministritë përkatëse, në bashkëpunim me bashkitë dhe strukturat e policisë rrugore, të përcaktojnë hapësira të posaçme për qarkullimin e mjeteve elektrike.

Kontrollet e policisë janë përqendruar në zonat urbane, në akset me qarkullim të dendur dhe pranë institucioneve arsimore, me qëllim që të rritet ndërgjegjësimi për respektimin e rregullave të qarkullimit rrugor nga të gjithë përdoruesit e rrugës.

Policia kerkon nga qytetaret të respektojnë urdhrin për ndalimin e përkohshëm të monopatinave, deri në miratimin e rregullores së re. Sipas autoriteteve, qëllimi i këtij vendimi nuk është ndëshkimi i qytetarëve, por rritja e sigurisë publike dhe parandalimi i aksidenteve, veçanërisht në zonat e frekuentuara nga fëmijë dhe të rinj.