Aksident i rëndë në Gjermani, humbin jetën tre shtetas shqiptarë

Ministria për Evropën dhe Punët e Jashtme njofton se aksidenti sipas autoriteteve gjermane, ka ndodhur pranë qytetit Koblenz.

Njoftimi i Minsitrisë së Jashtme:

Ministria për Evropën dhe Punët e Jashtme është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz, ku janë përfshirë disa shtetas shqiptarë.

Me keqardhje njoftojmë se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale.

Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet. Hetimet për rrethanat e aksidentit janë ende në vijim.

Ministria për Evropën dhe Punët e Jashtme shpreh ngushëllimet më të sinqerta për familjet e viktimave dhe uron shërim të plotë për të plagosurit.

Strukturat tona konsullore kanë ofruar mbështetjen e nevojshme për qytetarët e prekur dhe kanë qenë të angazhuara gjatë gjithë ditës për të ndihmuar në menaxhimin e situatës.

Për çdo informacion shtesë, lutemi të kontaktoni në: +49 1523 79 13 997

Detajet nga aksidenti/ Çfarë ndodhi në Koblenz të Gjermanisë ku humbën jetën 3 shqiptarë

Media gjermane “Bild” ka ndarë detaje dhe pamje nga aksidenti i rëndë që ndodhi mëngjesin e së dielës në Koblenz të Gjermanisë. Ngjarja ndodhi rreth orës 3:05 të mëngjesit, sipas policisë gjermane.

Një minibus me nëntë vende doli nga rruga në të djathtë dhe më pas u përmbys. Asnjë automjet tjetër nuk ishte i përfshirë.

Autostrada fillimisht u mbyll plotësisht midis Koblenzit dhe Ochtendungut herët në mëngjes. Sipas policisë, trafiku u devijua nëpërmjet Autostradës 61. Puna e shpëtimit zgjati me orë të tëra.

Hetimi i policisë për të zbardhur se si ndodh aksidenti i tmerrshëm rrugor është duke vijuar.