Pas aksidentit në Arizona Uber ndalë qarkullimin e veturave të saj vetë-vozitëse

28 Mars 2017 - Gazeta Express

Pas aksidentit në Arizona Uber ndalë qarkullimin e veturave të saj vetë-vozitëse

Uber ka ndalur qarkullimin e veturave të saj vetë-vozitëse pas një aksidenti i cili ka ndodhur në Arizona. Në këtë aksident është dëmtuar edhe një veturë tjetër, siç mund të shohim nga fotografia, raporton BBC.

Vetura - një SUV i Volvos – ishte në opsionin vetë-vozitës në kohën kur ka ndodhur aksidenti, të premten, tha Uber, transmeton Koha.net. Askush nuk është lënduar.

Një zëdhënëse e policisë në Tempe, Arizona, ka thënë se aksidenti ka ndodhur kur vetura tjetër nuk ka sinjalizuar për kthim majtas dhe është përplasur me veturën e Uberit.

"Në veturë te ulësja e shoferit ishte një person. Është e paqartë për momentin nëse personi e kishte nën kontroll veturën në kohën e përplasjes", ka thënë zëdhënësja Josie Montenegro.

Veturat vetë-vozitëse të Uberit gjithmonë kanë një njeri në ulësen e shoferit i cili mund të marrë veturën nën kontroll në çdo moment.

Kompania, së pari ka ndalur qarkullimin e veturave vetë-vozitëse nga rrugët e Arizonës, pastaj në Pensilvani dhe Kaliforni.