Lajmin e ka njoftuar mëngjesin e sotëm kryeministri Edi Rama, nëpërmjet një statusi në rrjetet sociale.
Kreu i qeverisë ka publikuar pamje nga aksi rrugor Thumanë-Kashar, ndërsa thotë se do të jetë i aksesueshëm prej orës 19:00.
“MIRËMËNGJES,
dhe me këtë fluturim mbi Thumanë-Kashar për të shijuar atë që është ndërtuar në tokë, një aks rrugor që na shërben të gjithëve dhe zhvillimit të mëtejshëm të turizmit duke qenë i aksesueshëm për të gjithë nga sot prej orës 19:00, ju uroj të diel të mbarë”, shkruan Rama.
Ministrja Balluku ndan pamje nga autostrada e re Thumanë-Kashar, pjesë e Korridorit Blu
Autostrada e kategorisë A Thumanë-Kashar hapet të dielën, datë 30 qershor, në orën 19:00 për qarkullimin e automjeteve.
Zëvendëskryeministrja, njëherësh ministre e Infrastrukturës dhe Energjisë, Belinda Balluku, ndau në rrjete sociale pamje nga autostrada e re Thumanë-Kashar, teksa shkroi “Thumane – Kashar from the Air. Part 3”.
Balluku falënderoi Alket Islamin për videon që, siç tha ministrja, “tregon punën e jashtëzakonshme që është bërë vetëm në 15 muaj, për të qenë gati”.
Aksi Thumanë-Kashar është njëkohësisht edhe loti i parë i Korridorit Blu.
Autostrada Thumanë-Kashar është i aks i kategorisë A, ku shpejtësia e lëvizjes do të jetë 130 kilometra në orë, duke ofruar gjithashtu kushte të larta sigurie.
Hapja e këtij aksi për qarkullimin e automjeteve do të lehtësojë ndjeshëm fluksin e trafikut.
Ndërkohë të gjithë drejtuesit e automjeteve do të kenë të drejtë të zgjedhin rrugët e shpejtësisë mbi 130 kilometra në orë me pagesë, apo rrugët dytësore të cilat do të jenë të disponueshme pa asnjë lloj pagese.
Aksi Thumanë-Kashar/ Berisha: Është vendosur taksë për ardhjen në Tiranë, të ngrihen banorët e veriut
Ish-kryeministri Sali Berisha ka reaguar në lidhje me hapjen e aksit rrugor Thumanë-Kashar, për të cilën thotë se u deshën 11 vite të inaugurohej nga qeveria.
Berisha deklaron se ky aks do të jetë me pagesë, ndërsa e cilëson si një ndëshkim për banorët e veriut nga Thumana deri në Vermosh dhe Valbonë.
Kreu i PD-së i bën thirrje banorëve të qarqeve të veriut të ngrihen kundër taksës së qeverisë dhe të mos pranojnë diskriminimin.
Shkrimi i plotë në rrjetet sociale:
Të dashur qytetare dhe qytetarë, sot Rilindja e Edi Ramës inaguron pas 11 vitesh në pushtet, 27 kilometrat e para autostradë të nisura dhe përfunduara prej saj. Por unë duke shprehur vlerësimin tim për çdo kilometër rrugë që ndërtohet në këtë vend, jam sot para jush për të denoncuar diskriminimin ekstrem, ndëshkimin që Edi Rama u bën banorëve të veriut nga Thumana deri në Vermosh dhe Valbonë, duke vendosur aty një taksë për ardhjen e tyre në Tiranë. Theksoj këtu se për qarkun e Kukësit, qarkun më të varfër të kontinentit, i cili është rreth 38-40 vite mbrapa me të ardhura me Tiranën, kjo është taksa e dytë që ata duhet të paguajnë pas taksës së Rrugës së Kombit. Por nga ana tjetër kjo taksë, është një ndëshkim për të gjithë turistët dhe vizitorët që vijnë nga Kosova, të cilët së bashku me ata që vijnë nga Mali i Zi, Muriqani dhe Hani I Hotit dhe nga Europa në këto akse, përbëjnë mbi 70% të turistëve që vijnë në Shqipëri. Për vizitorët nga Kosova kjo taksë e rrit në 17 Euro shtësë vizitën apo udhëtimin e tyre turistik në Shqipëri. Shumë kjo që nuk ekziston në asnjë vend tjetëe sado të madh të kontinentit Europian.
Ndaj dhe une ju bëj thirrje banorëve të qarqeve të veriut të ngrihen kundër këtij diskriminimi anti-shqipëtar, anti-kushtetues të Edi Ramës me taksën që ka vendosur ndaj tyre. Kjo sepse sot aktualisht në të gjitha zonat e tjera të Shqipërisë nga Tirana në Leskovik, në Qafë Botë, në Kakavijë lëvizet në autostrada dhe superstrada pa asnjë taksë. Pra është një diskriminim që ju të dashur banorë të zonave të veriut nuk duhet ta pranoni kurrsesi.
Faleminderit!
Lajmet përkatëse
